சிலந்திக் கூடு

வாழ்க்கைச் சிலந்திக் கூட்டில்
விடுதலை கிடைத்தும் அடிமையாய்
விரும்பியே கிடக்கிறோம் இருவரும்.

கூட்டின் ஒரு முனையை நீயும்

மறுமுனையை நானும் பற்றியிருந்தாலும்
உன் கழுகுப் பார்வையால்
என் ஒவ்வொரு அசைவையும்
வழிநடத்துகிறாய் உனை நோக்கி.....

புரிதலெனும் போர்க்களத்தில்
உயிர்த்தெழும் சண்டைகளனைத்தும்
உரமாகின்றன நம் அன்பெனும் மரத்திற்கு

மரம் பூத்துக் குலுங்குகையிலும்
நிழலில் இளைப்பாறிய படியே
தொடர்கிறது நமது சண்டைகள்